భారత అంతరిక్ష పరిశోధన సంస్థ (ఇస్రో) అత్యంత ప్రతిష్ఠాత్మకంగా చేపట్టిన చంద్రయాన్-2లో మరో కీలక ఘట్టానికి రంగం సిద్ధమవుతోంది.
ఈ మంగళవారమే చంద్రుడి కక్ష్యలోకి ప్రవేశించిన వాహకనౌక నుంచి.. 'విక్రమ్' ల్యాండర్ వేరు కానుంది.
సెప్టెంబర్ 7న చంద్రుడిపై ల్యాండర్ దిగనుందని ఇస్రో అధినేత శివన్ వెల్లడించారు.
తెల్లవారుజామున 1.55 గంటలకు ఈ ప్రక్రియ పూర్తవుతుందని ప్రకటించారు.
చంద్రుని కక్ష్యను ఈ బుధవారమే రెండోసారి తగ్గించుకున్న చంద్రయాన్-2.. కీలక ఘట్టానికి ముందే మరో మూడుసార్లు కక్ష్యను తగ్గించుకోనుంది.
అనంతరం చంద్రుని ఉపరితలానికి 100 కిలోమీటర్ల దూరంలోని తుది ఆర్బిట్కు చేరుకుంటుంది.
విక్రమ్ ల్యాండర్ సెప్టెంబర్ 2నే ఆర్బిటర్ నుంచి వేరై చంద్రుని చుట్టూ 100 కి.మీ X 30 కి.మీ ఆర్బిట్లోకి ప్రవేశించనుంది.
అనంతరం సెప్టెంబర్ 7న జాబిల్లి ఉపరితలంపై దిగనుందని ఇస్రో ప్రకటించింది.
ప్రధానికి ఆహ్వానం..
విక్రమ్ ల్యాండర్ చందమామపై దిగే అద్భత ఘట్టానికి హాజరవ్వాలని ప్రధాని మోదీకి ఆహ్వానం పంపినట్లు శివన్ తెలిపారు.
ఇస్రో సంస్థలో లింగబేధాలు లేవని.. చంద్రయాన్-2 ప్రయోగ సమయంలో ఇద్దరు మహిళలకు అవకాశం దక్కిందని గుర్తుచేశారు శివన్.
భవిష్యత్తులో జరగబోయే ప్రతిష్ఠాత్మక ప్రాజెక్టుల్లోనూ మహిళా శాస్త్రవేత్తలను భాగస్వాములను చేస్తామని స్పష్టం చేశారు.
శివన్కు కలాం అవార్డు..
తమిళనాడు ప్రభుత్వం ప్రదానం చేసే డాక్టర్‌ ఏ పీ జే అబ్దుల్‌ కలాం పురస్కారాన్ని ఇస్రో ఛైర్మన్‌ కే శివన్ అందుకున్నారు.
శాస్త్ర సాంకేతిక రంగాల్లో సేవలందించినందుకు గానూ.. గురువారం ఉదయం ఈ అవార్డును శివన్కు అందజేసింది తమిళనాడు ప్రభుత్వం.
5 గ్రాములు విలువ చేసే బంగారు పతకం, 5 లక్షల రూపాయల నగదును ఇస్రో అధినేతకు అందజేశారు ముఖ్యమంత్రి పళనిస్వామి.
